Ўзбекистон Республикаси Ҳукумат портали доирасида «Ҳукумат болалар нигоҳида» веб-сайти (www.kids.gov.uz) ишга туширилди. Бу ҳақда портал хабар бермоқда.
Мазкур веб-сайт 2016 йил мамлакатда «Соғлом она ва бола йили» деб эълон қилинганлиги муносабати билан ҳамда ахборот-коммуникация технологияларини амалиётга кенг жорий этган ҳолда болаларни Ўзбекистон тўғрисида умумий маълумотлар билан яқиндан таништириш, уларнинг сиёсий ва ҳуқуқий билимларини шакллантириш мақсадида яратилди.
Веб-сайт 6—12 ёшдаги болалар учун мўлжалланган бўлиб, бошланғич синф ўқувчилари дарс жараёнида фойдаланиши мумкин. Унда Ўзбекистон ҳамда Ўзбекистон Республикаси давлат ҳокимияти тизими тўғрисидаги умумий маълумотлар содда матнлар ва расмлар ёрдамида тасвирлаб берилган.
«Ҳукумат болалар нигоҳида» веб-сайти Ўзбекистонда ишлаб чиқилган шу туркумдаги илк лойиҳа бўлганлиги сабабли у келажакда келиб тушган таклифлар асосида янада бойитиб ва такомиллаштириб борилиши назарда тутилган.
Изоҳ (0)