Полиция Орландодаги тунги клубга уюштирилган ҳужум оқибатида 20 киши ҳалок бўлганини маълум қилди

Орландо (Флорида штати, АҚШ) полицияси раҳбари Жон Мина матбуот вакиллари учун уюштирилган брифинг чоғида номаълум шахс томонидан ташрифчилари ўққа тутилган ва гаровга олинган Pulse клубида 20 кишининг жасади топилганини маълум қилди. Бу ҳақда, полиция бошқармасининг Twitter’даги расмий саҳифасига таяниб, «РБК» хабар бермоқда.

Шунингдек, ҳужум оқибатида 42 киши яралангани айтилмоқда.

Илгарироқ номаълум шахс клубда ўт очиб, ташрифчиларни гаровга олгани хабар қилинган эди. ОАВ яраланганлар сони 20 кишидан ошишини хабар қилган, воқеа гувоҳлари эса ижтимоий тармоқлар орқали отишмада қурбон бўлганлар ҳам борлигини эътироф этган эди.

Жиноятчи билан отишмада тўққиз полициячи иштирок этди. Жиноятчи отиб ўлдирилди.

Тунги клубда содир этилган жиноятни полиция бошқармаси раҳбари «ички террорчилик» деб баҳолади.

Жиноятчининг мотивлари ҳозирча аниқланган эмас. Унинг шериклари бўлган-бўлмагани ҳам номаълум.