Мол-мулки 60 миллиард доллардан зиёд баҳоланадиган, Forbes журналининг дунёнинг энг бой одамлари рейтингида учинчи ўринда турувчи америкалик инвестор Уоррен Баффетт билан хайрия тушлигига таклиф eBay интернет-аукционида 3,457 миллион долларга сотилди. Бу ҳақда «ТАСС» хабар бермоқда.
Бу йилги тушум рекорд даражада юқори деб тан олинган 2012 йилги ким ошди савдоси суммаси билан бир хил бўлди. The Wall Street Journal нашрига кўра, аукционда тадбиркорнинг ўзини ошкор этишни истамаган мухлиси ғолиб чиққан. У Нью-Йорк марказидаги Smith and Wollensky ресторанида бўлиб ўтадиган тушликка яна етти кишини таклиф этиш ҳуқуқига эга.
Бундай аукционлар 2000 йилдан бери ўтказиб келинади. Уларнинг биринчисида тушум атиги 24 минг долларни ташкил этган, жами тушум эса ҳозиргача 23 миллион доллардан ошиб кетди. Баффет билан суҳбат одатда уч соат атрофида давом этади ва унда миллиардер ҳамсуҳбатлари билан кенг доирадаги масалаларни муҳокама қилади. Суҳбат давомида ягона ман этилган мавзу миллиардернинг келгуси инвестицияларига тегишли: Баффет бу ҳақдаги саволларга ҳеч қачон жавоб бермайди.
Изоҳ (0)