Тошкентда «Биз – буюк юрт фарзандларимиз!» шиори остида ёшлар фестивали ўтказилди. Бу ҳақда ЎзА хабар бермоқда.
Тошкент тўқимачилик ва енгил саноат институти қошидаги академик лицейда ташкил этилган «Ватаним – менинг фахрим» лойиҳаси доирасида адиб ва шоирлар, тарғибот гуруҳи аъзолари лицей ўқувчилари билан учрашиб мушоира ўтказди.
Бобур номидаги маданият ва истироҳат боғи, Ўзбекистон Республикаси Ички ишлар вазирлигига қарашли спорт мажмуасида «Талабалар театр студияси», «Ёшлар жонли ижро тарафдори», «Биз – соғлом турмуш тарзи тарафдоримиз» лойиҳаси, футбол-шоу ва гала-концерт ўтказилди. Таниқли спорт усталари, Ўзбекистон ҳамда жаҳон чемпионлари иштирокида маҳорат дарслари, учрашувлар ташкиллаштирилди.
Учтепа миллий ҳунармандлик касб-ҳунар коллежида «Кичик фильмдан катта кинога» лойиҳаси доирасида ёш киноижодкорлар томонидан тасвирга туширилган қисқа метражли фильмлар намойиши кўпчиликка манзур бўлди. 228-умумтаълим мактабида ташкил этилган «‘Камолот’ кутубхонаси» лойиҳасида ёшлар ўртасида турли викториналар ҳамда янги чоп этилган китоблар тақдимоти ўтказилди. Ижтимоий ҳимояга муҳтож оилалар фарзандларига китоблар совға қилинди. Ўзбекистон давлат жаҳон тиллари университетида «Барон» бадиий фильми намойиш этилиб, кенг муҳокама қилинди.
Фестиваль доирасида Шайхонтоҳур, Юнусобод, Яшнобод, Бектемир, Миробод туманларида «Ҳоким ва ёшлар», «‘Оммавий маданият’ ва ёшлар маънавияти», «Одам савдоси – давр муаммоси», «Диний экстремизм ва терроризм – ёшлар келажагига таҳдид» лойиҳалари ўтказилди. Хусусан, «Ҳоким ва ёшлар» лойиҳасида туман ҳокимлари иштирокчиларга ёшларнинг таълим олиши, касб-ҳунар эгаллаши, бандлигини таъминлаш борасида олиб борилаётган ишлар ҳақида сўзлаб берди. Ёшлар ўзларини қизиқтирган саволларга жавоб олиш билан бирга, ўз таклиф ва истакларини баён этди.
Меҳнат фахрийлари ва ёлғиз кексалар ҳолидан хабар олиш, уларнинг уй юмушларига кўмаклашиш учун ишлаб чиқилган «Нуронийлар эъзозимизда» лойиҳаси, «Алкоголь ва тамаки маҳсулотларининг тарқатилиши ҳамда истеъмол қилинишини чеклаш тўғрисида»ги Ўзбекистон Республикасининг қонуни ижроси юзасидан жамоатчилик назоратини ўрнатиш мақсадида ўтказилаётган «Виждонли сотувчи» акциялари ҳам ёшларга манзур бўлди. «Ҳеч ким меҳр ва эътибордан четда қолмасин!» лойиҳаси доирасида тарғибот гуруҳи аъзолари Чилонзор туманидаги 22-Меҳрибонлик уйига бориб, тарбияланувчилар учун маданий тадбир ўтказди.
«Туркистон» саройининг ёзги майдонида ўтказилган фестивалнинг якуний гала-концертида фаол ёшлар қатор номинациялар бўйича «Камолот» ёшлар ижтимоий ҳаракати марказий кенгаши ва Тошкент шаҳар ҳокимлигининг эсдалик совғалари билан тақдирланди.
Изоҳ (0)