The Telegraph: Ўзбекистонда ўзингизни замонлар оша саёҳат қилаётгандек сезасиз

Буюк Британиянинг The Telegraph нашри Ўзбекистонга ташриф буюриш учун 11 та сабаб келтирилган мақолани чоп этди. Шу сабаблардан энг қизиқарлиларини эътиборингизга ҳавола этамиз.

Бу ерда Буюк ипак йўлининг энг яхши қисмлари жойлашган

«Агар сиз Буюк ипак йўлига қизиқсангиз, аммо уни Хитойдан Туркиягача бўлган бор бўйича саёҳат қилишга вақтингиз бўлмаса, ушбу йўлнинг учта энг муҳим шаҳарларини Ўзбекистонда топасиз. Хива, Бухоро ва Самарқанд савдогарлар учун асосий тўхташ жойлари бўлган», — дейилади мақолада.

Ўзингизни замонлар оша саёҳат қилаётгандек сезасиз

«Хива ЮНЕСКО ҳимоясига олинган очиқ осмон остидаги музей, аммо у ерда ҳалигача оилалар яшайди, тадбиркорлик фаолияти олиб борилади, — дея қайд этилади мақолада. — Унга VI асрда асос солинган ва Буюк ипак йўлининг савдо шаҳри сифатида гуллаб-яшнаган — масжид, мадраса ва мақбаралар шаҳарнинг эгри-бугри ва чалкаш кўчаларида кўпайиб борган, уларнинг барчаси эса моҳирона тарзда қайта тикланган.

Кеч туша бошлагач, маҳаллий сайёҳлар — суратга тушиш пайида гўзал манзара қидирган келин-куёвлар-у, ҳунармандчилик буюмларини кўз-кўз қилган усталар уйга кетиб, кўчалар ҳувиллаб қолади. Сўниб бораётган қуёш нури остида қалдирғочлар парвоз қилаётган ва лой деворлари шафақда қизариб қолган кўчаларни кезар экансиз, ўзингизни беихтиёр XII асрда юргандек ҳис қиласиз».

Манзилга етиб бориш сиз ўйлагандан кўра осонроқ

Ўзбекистондаги асосий манзилгоҳларга арзон ички парвозлар, йўл боғламалари ва тезюрар поездлар билан етиб бориш мумкинлиги таъкидланган. «Шаҳарларнинг барчасида такси ва автобус хизматлари мавжуд, бунинг устига, Тошкентда бекатлари Санкт-Петербург услубида ҳашаматли қилиб безатилган яхшигина метро бор», — деб ёзади нашр.

Ўзбекистонга саёҳат — хавфсиз

Нашр Ўзбекистонда ҳеч кимга хиралик қилинмаслиги, қатъий «йўқ» дейиш орқали ёқимсиз вазиятга чек қўйиш мумкинлигини қайд этди. «Бу ерда сайёҳларга нисбатан жиноят жуда кам кузатилиши кишини хотиржам қилади», — дейилади мақолада.

Харид учун ажойиб жой

«Амир Темур ва унинг авлодлари Хива, Самарқанд ва Бухоро шаҳарларини гўзаллаштириш учун мамлакатнинг турли бурчакларидан кулол, рассом ва меъморларни чақиради. Уларнинг масжидлари энг нафис деворий суратлар ва терма нақшлар билан безатилади. Ўзбекистонда ҳунармандчилик маҳорати ҳозиргача сақланиб қолган, сиз ҳозирда бозорларга айлантириб юборилган мадрасаларнинг кўпчилигида арзимаган пулга кулолчилик буюмлари, кашталар, ипак мато ва  миниатюраларни харид қилишингиз мумкин», — дейилади мақолада.

Ҳайратланарли даражада дунёвий

Нашр Тошкент ва Бухоро шаҳарлари айниқса европача шароитга эга эканлигини қайд этади. «Кўл бўйидаги пивохоналар, истироҳат боғлари ва асосий сайёҳлик манзилгоҳлари ёнидаги қаҳвахоналарни кўз олдингизга келтиринг. Музқаймоқ еб, чексиз миқдорда кўк чой симиргач, Ўзбекистонга саёҳатингиз қувноқ ўтаётганидан мамнун бўласиз, холос», — дея қайд этилади нашр хабарида.