Россия ҳарбий-коинот кучларининг Су-27 қирувчи самолёти Москва вилоятидаги аэродромга қайтиш чоғида ҳалокатга учради. Бу ҳақда Россия мудофаа вазирлиги матбуот хизмати маълум қилди, дея хабар бермоқда «ТАСС».
«9 июнь, пайшанба куни Москва вақти билан соат 10:25 (Тошкент вақти билан 12:25) да режали парвоздан сўнг Москва вилоятидаги аэродромга қайтиш чоғида Россия ҲКК Су-27 самолёти қулади. Учувчи ҳалок бўлган. Парвоз жанговар қурилмаларсиз амалга оширилганди», — дейилади матбуот хизмати хабарида.
Ҳодиса жойида вайронагарчиликлар йўқ, мазкур манзилда мудофаа вазирлиги комиссияси ишламоқда. Минтақа куч тизимларидаги манбанинг билдиришича, ҳалокатга учраган самолёт «Русские витязи» парвоз гуруҳига тегишли бўлган, уни майор Сергей Еременко бошқарган.
Дастлабки тахминларга кўра, қирувчи ҳалокатига техник носозлик сабаб бўлган. Учувчи самолётни аҳоли пунктидан четга олиб ўтиш учун зарур барча ҳаракатларни амалга оширган.
Изоҳ (0)