Пентагон собиқ раҳбари Леон Панетта, Марказий разведка бошқармаси собиқ директори Майкл Хейден ва яна уч нафар истеъфодаги юқори лавозимли мулозимлар сенатор Жон Маккейннинг Пентагоннинг Россия ракета двигателларига боғлиқлигини камайтириш ҳақидаги ташаббусини маъқуллади, деб ёзади «РБК» Маккейнга йўналтирилган хат матнига таяниб.
«Бизда Америкага тегишли ишлаб чиқариш базаси бор, унинг бир нечта етказиб берувчилари Америка ракета двигателларини ишлаб чиқара олади. Ушбу нозик, ўта муҳим технологияни ишлаб чиқариш учун бизда Путиннинг Россиясига суяниш зарурати йўқ», — дейилади мурожаатда.
Собиқ амалдорлар таъкидлашича, кўп йиллар давомида Россия ҳарбий капиталини ўстириб келган, бу, хусусан, АҚШга РД-180 двигателини сотишдан тушган пул эвазига амага оширилган. Шунингдек, Россия Пентагоннинг «боғлиқлиги»дан «ташқи сиёсий мунозараларда фойдаланган».
Маккейн 2014 йил майида Америка ҳарбий сунъий йўлдошларини учириш вақтида Россия томонидан ишлаб чиқарилган ракета двигателларидан фойдаланишдан воз кечишни талаб қилган эди. У буни Россия «АҚШ миллий хавфсизлигининг энг қимматбаҳо сунъий йўлдошларини хатарга қўяётгани» билан изоҳлаганди.
Изоҳ (0)