Футбол бўйича Ўзбекистон миллий терма жамоаси ҳамда Қатарнинг «Ал-Жаиш» клуби ҳужумкор ярим ҳимоячиси Сардор Рашидов кеча, 31 май куни уйланди. Келиннинг исми — Лазизаой.
Никоҳ тўйи маросими футболчи туғилиб ўсган Жиззах шаҳрида бўлиб ўтди. Бу ҳақда Ўзбекистон футбол федерациясининг Twitter’даги саҳифасида маълум қилинди.
Сардор Рашидовнинг никоҳ тўйи маросимига Ўзбекистон миллий терма жамоаси бош мураббийи Самвел Бабаян, «Пахтакор» бош мураббийи вазифасини бажарувчи Григорий Колосовский, миллий терма жамоа сардори Одил Аҳмедов, шунингдек, Александр Гейнрих, Санжар Турсунов, Жасур Ҳасанов, Игнатий Нестеров сингари бир қатор терма жамоа футболчилари ҳам ташриф буюрди.
Қайд этиш жоиз, 2 июнь куни Ўзбекистон терма жамоаси Тошкентда Экваториал Гвинеяга қарши ўртоқлик ўйинини ўтказиши керак эди. Мазкур учрашувга миллий терма жамоа бош мураббийи Самвел Бабаян хориж миллий чемпионатларида тўп суриб, мавсумни яқиндагина якунлаган Одил Аҳмедов («Краснодар»), Виталий Денисов («Локомотив»), Азиз Ҳайдаров («Аш-Шабаб»), Сардор Рашидов («Ал-Жаиш») каби футболчиларга кичик таътил берганди. Кейинроқ Экваториал Гвинеяга қарши ўртоқлик ўйини бекор қилинди.
Изоҳ (0)