Тошкентдаги Абдулла Қодирий кўчасининг Олой бозори яқинидан ўтган қисмида йўл қатламининг юқори қисми таъмирлаш мақсадида олиб ташлангани, айни вақтда, таъмирлаш ишлари ҳақида ҳеч қандай огоҳлантирувчи белгилари ўрнатилмагани оқибатида, бир қатор ҳайдовчилар моддий зарар кўрди, йўл-транспорт ҳодисалар юз берди. Бу ҳақда Facebook’даги «Водители Ташкента» гуруҳида фотохабар қолдирилган.
«Эҳтиёт бўлинглар, Central кафеси яқинидаги кўприк остига тушаётганда тезликни пасайтиринглар. Асфальтни «шилиб олишибди», кўрмай қолдим, балоним ёрилиб кетди», — деб ёзади жабрланувчилардан бири.
Муҳокамага қўшилган фойдаланувчилар орасида айнан шу йўлда автомобили ғилдираги синиб, энди устахонада ўтирган ҳайдовчилар ҳам топилган. Бошқа бир фойдаланувчи ҳам шинаси йиртилиб кетганини қўшимча қилган.
Гуруҳ фойдаланувчиларининг қўшимча қилишича, Абдулла Қодирий кўчасининг асфальти кўчириб олинган қисмида «Жигули» ва Lacetti автомобиллари иштирокида авария ҳам юз берган.
«Туннелдан чиқиб келаётган «Жигули» йўлнинг бу аҳволда эканини кутмаган шекилли, бирдан тормозни босди, ортидан эса етарлича катта тезликда келаётган Lacetti етиб олди. Яхшигина тўқнашув бўлди», — деб ёзади фойдаланувчилар.
«Водители Ташкента» гуруҳи аъзолари таъмирлаш ишлари олиб борилаётган йўлларга тегишли огоҳлантирувчи белгилар, пешлавҳалар ўрнатилиши зарурлиги, зарурат туғилса, йўлларнинг бундай қисмларида йўл назоратчилари навбатчилик қилиши кераклигини ёзган.
Изоҳ (0)