«Локомотив» Осиё Чемпионлар Лигасининг ўзидан ҳозирча 240 минг АҚШ доллари ишлаб топди

Тошкентнинг «Локомотив» клуби ўз тарихида биринчи бор Осиё Чемпионлар Лигасининг гуруҳ босқичини муваффақиятли якунлаб, чорак финалга қадар етиб борди. Бу эса клуб ғазнасининг 240 минг долларга бойиб олишини таъминлади.

• «Бунёдкор» стадионидаги қора анъана «Локомотив» томонидан йўққа чиқарилди

«Championat.asia» маълумотига кўра, Осиё Чемпионлар Лигасининг гуруҳ босқичидаги ҳар бир ғалаба учун 40, дуранг учун эса 20 минг доллар мукофот пули берилади. Маълумот учун, «Локомотив» ўзи иштирок этган гуруҳнинг 4 та беллашувида дуранг қайд этган бўлса, қолган 2 тасида рақибларини мағлуб этишга муваффақ бўлганди.

• «Локомотив» ўз тарихида илк бор ОЧЛ чорак финалига чиқди

1/8 финал босқичидан ўтиб олгани учун «Локомотив» қўшимча 80 минг АҚШ доллари ишлади. Натижада клубнинг мавсум бошидан буён Осиё Чемпионлар Лигасида қилган даромади 240 минг долларга етди. Агар «темирйўлчилар» чорак финалдан ҳам эсон-омон ўтиб олса, у ҳолда яна 120 минг доллар клуб ғазнасига келиб тушади.

Гуруҳ босқичидаги 2 та ўйинда зафар қучган «Пахтакор» 160 минг доллар билан кифояланди ва турнирни тарк этди. «Насаф» ва «Бунёдкор» эса 80 минг долларлик бўлди. Бунда «Бунёдкор»нинг плей-офф босқичидаги ғалабаси учун берилган 20 минг доллар ҳам қўшиб ҳисобланган.

Маълумуот учун, ярим финалда ғолиб чиққан клуб 200 минг долларга эгалик қилади. Осиё Чемпионлар Лигасининг финалига йўл олган жамоа 1,5 миллион АҚШ долларини санаб олади. Турнир ғолиби эса 3 миллион долларни қўлга киритади.