Toshkentning “Lokomotiv” klubi o‘z tarixida birinchi bor Osiyo Chempionlar Ligasining guruh bosqichini muvaffaqiyatli yakunlab, chorak finalga qadar yetib bordi. Bu esa klub g‘aznasining 240 ming dollarga boyib olishini ta’minladi.

• “Bunyodkor” stadionidagi qora an’ana “Lokomotiv” tomonidan yo‘qqa chiqarildi

“Championat.asia” ma’lumotiga ko‘ra, Osiyo Chempionlar Ligasining guruh bosqichidagi har bir g‘alaba uchun 40, durang uchun esa 20 ming dollar mukofot puli beriladi. Ma’lumot uchun, “Lokomotiv” o‘zi ishtirok etgan guruhning 4 ta bellashuvida durang qayd etgan bo‘lsa, qolgan 2 tasida raqiblarini mag‘lub etishga muvaffaq bo‘lgandi.

• “Lokomotiv” o‘z tarixida ilk bor OChL chorak finaliga chiqdi

1/8 final bosqichidan o‘tib olgani uchun “Lokomotiv” qo‘shimcha 80 ming AQSh dollari ishladi. Natijada klubning mavsum boshidan buyon Osiyo Chempionlar Ligasida qilgan daromadi 240 ming dollarga yetdi. Agar “temiryo‘lchilar” chorak finaldan ham eson-omon o‘tib olsa, u holda yana 120 ming dollar klub g‘aznasiga kelib tushadi.

Guruh bosqichidagi 2 ta o‘yinda zafar quchgan “Paxtakor” 160 ming dollar bilan kifoyalandi va turnirni tark etdi. “Nasaf” va “Bunyodkor” esa 80 ming dollarlik bo‘ldi. Bunda “Bunyodkor”ning pley-off bosqichidagi g‘alabasi uchun berilgan 20 ming dollar ham qo‘shib hisoblangan.

Ma’lumuot uchun, yarim finalda g‘olib chiqqan klub 200 ming dollarga egalik qiladi. Osiyo Chempionlar Ligasining finaliga yo‘l olgan jamoa 1,5 million AQSh dollarini sanab oladi. Turnir g‘olibi esa 3 million dollarni qo‘lga kiritadi.