Ўзбекистон Президентининг 13 майдаги фармонига мувофиқ ташкил этилган Алишер Навоий номидаги Тошкент давлат ўзбек тили ва адабиёти университети жорий ўқув йилида 300 нафар талабани ўқишга қабул қилади. Бу ҳақда, «Газета.uz»нинг хабар беришича, янги олий таълим муассасаси фаолиятини ташкил этиш бўйича Вазирлар Маҳкамасининг 13 майдаги қарорида сўз боради, қарорга Ўзбекистон Президенти Ислом Каримов имзо чеккан.
Қарорга кўра, бакалавриатга қабул қилинадиган дастлабки талабаларнинг 150 нафари давлат гранти асосида, қолган 150 нафари тўлов-контракт асосида таълим олади. Йўналишлар бўйича қабул квоталари қуйидагича белгиланган:
- Ўзбек тили филологияси — 80 та ўрин (40 та ўрин — грант/40 та ўрин — контракт);
- Ўзбек тили ва адабиёти — 120 (60/60);
- Ўзбек-инглиз таржима назарияси ва амалиёти — 100 (50/50).
Эслатиб ўтамиз, янги университет Ўзбекистон миллий университети (ЎзМУ)нинг ўзбек филологияси факультети, Тошкент давлат педагогика университетининг ўзбек тили ва адабиёти факультети, шунингдек, Фанлар академиясининг Алишер Навоий номидаги Тил ва адабиёт институти негизида ташкил этилмоқда.
Университетга ректор этиб 2015 йил июнидан бери ЎзМУга ректорлик қилиб келган филология фанлари доктори, профессор Шуҳрат Сирожиддинов тайинланган.
Изоҳ (0)