21 май куни Наманган шаҳрида Ўзбекистон матбуот ва ахборот агентлиги Наманган вилоят ҳокимлиги билан ҳамкорликда ташкил этилган «Наманган китоб олами» мажмуасининг тантанали очилиш маросими бўлиб ўтди. Бу ҳақда Ўзбекистон матбуот ва ахборот агентлиги хабар бермоқда.
Мазкур мажмуа 400 метр квадрат майдонни эгаллаган, унда турли йўналишдаги адабиётлардан таркиб топган кўркам савдо жавонлари ўрнатилган ва уларга Ўзбекистон нашриётлари томонидан нашр этилган 15 минг нусхадаги китоблар жойлаштирилган. Шу билан бирга мажмуада китобхонлар ҳордиқ чиқариши учун қулай шароитлар яратилиб, book-cafe фаолияти ташкил этилган.
Шунингдек, 21 май куни Фарғона шаҳрида ҳам «Фарғона китоб олами» мажмуасининг тантанали очилиш маросими ўтказилди. Мазкур китоб-савдо мажмуаси шаҳар марказидаги энг сўлим ва гавжум Каштанзор кўчасидаги собиқ «Ижодкорлар кўргазма зали» биносини тўлиқ реконструкция қилиш орқали янгитдан барпо этилиб, замонавий кўриниш олди.
Мажмуа 500 метр квадрат майдонни эгаллаган бўлиб, унинг расталарига икки мингдан зиёд номдаги жами 20 900 та турли адабиёт жойлаштирилган. Китоб-савдо мажмуасига ташриф буюрувчи китобхон-харидорларга қулай шароитлар яратилган.
22 май куни Фарғона водийсининг яна бир шаҳри Андижонда ҳам «Андижон китоб олами» мажмуаси очилди. Мазкур мажмуа 500 метр квадрат майдонни эгаллаган, унда турли йўналишдаги адабиётлардан таркиб топган кўркам савдо жавонлари ўрнатилган ва 25 минг нусхадаги китоблар жойлаштирилган.
Шу билан бирга Бухоро, Самарқанд ва Хоразм вилоятлари марказларида ҳам «Китоб олами» мажмуалари қурилиши ишлари якунланмоқда.
Изоҳ (0)