21-may kuni Namangan shahrida O‘zbekiston matbuot va axborot agentligi Namangan viloyat hokimligi bilan hamkorlikda tashkil etilgan “Namangan kitob olami” majmuasining tantanali ochilish marosimi bo‘lib o‘tdi. Bu haqda O‘zbekiston matbuot va axborot agentligi xabar bermoqda.
Mazkur majmua 400 metr kvadrat maydonni egallagan, unda turli yo‘nalishdagi adabiyotlardan tarkib topgan ko‘rkam savdo javonlari o‘rnatilgan va ularga O‘zbekiston nashriyotlari tomonidan nashr etilgan 15 ming nusxadagi kitoblar joylashtirilgan. Shu bilan birga majmuada kitobxonlar hordiq chiqarishi uchun qulay sharoitlar yaratilib, book-cafe faoliyati tashkil etilgan.
Shuningdek, 21-may kuni Farg‘ona shahrida ham “Farg‘ona kitob olami” majmuasining tantanali ochilish marosimi o‘tkazildi. Mazkur kitob-savdo majmuasi shahar markazidagi eng so‘lim va gavjum Kashtanzor ko‘chasidagi sobiq “Ijodkorlar ko‘rgazma zali” binosini to‘liq rekonstruksiya qilish orqali yangitdan barpo etilib, zamonaviy ko‘rinish oldi.
Majmua 500 metr kvadrat maydonni egallagan bo‘lib, uning rastalariga ikki mingdan ziyod nomdagi jami 20 900 ta turli adabiyot joylashtirilgan. Kitob-savdo majmuasiga tashrif buyuruvchi kitobxon-xaridorlarga qulay sharoitlar yaratilgan.
22-may kuni Farg‘ona vodiysining yana bir shahri Andijonda ham “Andijon kitob olami” majmuasi ochildi. Mazkur majmua 500 metr kvadrat maydonni egallagan, unda turli yo‘nalishdagi adabiyotlardan tarkib topgan ko‘rkam savdo javonlari o‘rnatilgan va 25 ming nusxadagi kitoblar joylashtirilgan.
Shu bilan birga Buxoro, Samarqand va Xorazm viloyatlari markazlarida ham “Kitob olami” majmualari qurilishi ishlari yakunlanmoqda.
Izoh (0)