«Севилья» бир йил муқаддам Европа Лигаси финалида Украинанинг «Днепр» клубини мағлуб этган, икки йил аввал эса Португалиянинг «Бенфика»сини пенальтилар сериясига кўра доғда қолдирган. Кетма-кет учинчи чемпионлик учун Унаи Эмери жамоасида яна биттагина қадам қолди.
«Ливерпуль» эса эҳтимолий ғалабаси билан турнирдаги муваффақиятлари сонини «Севилья»ники билан тенглаштириб олади. Андалусия клуби ўз тарихида тўрт бор: 2006, 2007, 2014 ва 2015 йилда бош совринга эга чиққан. Ливерпуль шаҳри жамоасида эса соврин ҳозирча учта: 1973, 1976, 2001. Қизиқ томони, «Ливерпуль» сўнгги бор айнан испан клуби бўлмиш «Депортиво Алавес»ни мағлуб этганди.
«Севилья» устози Унаи Эмери Европа Лигасидаги ғалабалари сонини учтага етказса, италиялик мутахассис Жованни Трапаттони билан тенглашиб олади. Трапаттони 1977 ва 1993 йилларда Туриннинг «Ювентус» клуби билан, 1991 йил эса Миланнинг «Интер» клуби билан УЕФА Кубогида зафар қучганди (Европа Лигасининг аввалги номи).
Юрген Клопп «Ливерпуль»га биринчи ташрифидаёқ халқаро совринга эга чиқиши мумкин. Маълумки, Европа Лигаси турнирида зафар қучган жамоа келаси мавсумни Европа Чемпионлар Лигасида ўтказади.
«Ливерпуль» Англия Премьер-лигасида мавсумни 8-ўринда якунлади. Бу эса халқаро майдон учун йўлланма бермайди. Испания Ла Лигасида еттинчи бўлган «Севилья» эса ўзи учун Европа Лигасининг навбатдаги йўлланмасини кафолатлаб қўйди. Бугун андалусияликлар Европа Чемпионлар Лигаси чиптасини ютиб олиш учун ҳаракат қилиб кўради.
Изоҳ (0)