“Sevilya” bir yil muqaddam Yevropa Ligasi finalida Ukrainaning “Dnepr” klubini mag‘lub etgan, ikki yil avval esa Portugaliyaning “Benfika”sini penaltilar seriyasiga ko‘ra dog‘da qoldirgan. Ketma-ket uchinchi chempionlik uchun Unai Emeri jamoasida yana bittagina qadam qoldi.
“Liverpul” esa ehtimoliy g‘alabasi bilan turnirdagi muvaffaqiyatlari sonini “Sevilya”niki bilan tenglashtirib oladi. Andalusiya klubi o‘z tarixida to‘rt bor: 2006, 2007, 2014 va 2015-yilda bosh sovringa ega chiqqan. Liverpul shahri jamoasida esa sovrin hozircha uchta: 1973, 1976, 2001. Qiziq tomoni, “Liverpul” so‘nggi bor aynan ispan klubi bo‘lmish “Deportivo Alaves”ni mag‘lub etgandi.
“Sevilya” ustozi Unai Emeri Yevropa Ligasidagi g‘alabalari sonini uchtaga yetkazsa, italiyalik mutaxassis Jovanni Trapattoni bilan tenglashib oladi. Trapattoni 1977 va 1993-yillarda Turinning “Yuventus” klubi bilan, 1991-yil esa Milanning “Inter” klubi bilan UEFA Kubogida zafar quchgandi (Yevropa Ligasining avvalgi nomi).
Yurgen Klopp “Liverpul”ga birinchi tashrifidayoq xalqaro sovringa ega chiqishi mumkin. Ma'lumki, Yevropa Ligasi turnirida zafar quchgan jamoa kelasi mavsumni Yevropa Chempionlar Ligasida o‘tkazadi.
“Liverpul” Angliya Premyer-ligasida mavsumni 8-o‘rinda yakunladi. Bu esa xalqaro maydon uchun yo‘llanma bermaydi. Ispaniya La Ligasida yettinchi bo‘lgan “Sevilya” esa o‘zi uchun Yevropa Ligasining navbatdagi yo‘llanmasini kafolatlab qo‘ydi. Bugun andalusiyaliklar Yevropa Chempionlar Ligasi chiptasini yutib olish uchun harakat qilib ko‘radi.
Izoh (0)