АПЛ. «МЮ» мавсумни 5-ўринда якунлади ва 2016/17 йилги мавсумда ЕЧЛ турнирида иштирок этмайди

Англия чемпионатининг сўнгги 38-туридан ўрин олган «Манчестер Юнайтед» – «Борнмут» учрашуви 15 май, якшанба куни бўлиб ўтиши керак эди. Аммо «Олд Траффорд» стадионининг Шимоли-Ғарбий қисмидаги секторларидан бирида топилган шубҳали пакет туфайли ўйин қолдирилган эди.

• «Лестер» клуби ўз тарихида биринчи бор Англия чемпионлигини қўлга киритди

Кейинроқ пакетнинг ичидаги буюм портловчи қурилмага ўхшаш муляж — ўқув-тайёргарлик мосламаси бўлиб чиқди ва учрашув 17 май куни бўлиб ўтиши хабар қилинди.

• АПЛ. «Арсенал» мавсумни кумуш медаллар билан якунлади 

«Sports.ru»нинг хабар беришича, 18 майга ўтар кечаси бўлиб ўтган учрашувда «Манчестер Юнайтед» 3:1 ҳисобида «Борнмут»ни мағлубиятга учратиб, 66 очко тўплаган ҳолда ҳамшаҳари «Манчестер Сити»га етиб олди. Аммо, «шаҳарликлар»нинг тўплар нисбати +30, «МЮ»ники +14 бўлгани учун 2016/17 йилги мавсумда Европа Чемпионлар Лигаси саралаш баҳсида иштирок этиш имкониятини берувчи тўртинчи ўрин «Манчестер Сити»га насиб қилди.

Луи ван Гал шогирдлари эса бешинчи ўринда қолиб кетди. Англия Премьер-лигасида бешинчи ўрин Европа Лигаси турнирида иштирок этиш ҳуқуқини беради.

«Манчестер Юнайтед» — «Борнмут» учрашуви билан Англия Премьер-лигасининг 2015/16 йилги мавсумига расман якун ясалди.

Қайд этиш жоиз, «қизил иблислар» жорий мавсумни соврин билан якунлаш имкониятига эга. Луи ван Гал шогирдлари Англия Кубоги ғолиблиги учун 21 май, шанба куни Лондоннинг «Кристал Пэлас» жамоасига қарши баҳс олиб боради.

Англия чемпионати, 38-тур

«Манчестер Юнайтед» – «Борнмут» 3:1 (1:0)

Голлар: 1:0 – 43 Руни, 2:0 – 74 Рэшфорд, 3:0 – 87 Янг, 3:1 – 90, автогол Смоллинг.

Огоҳлантириш: Мата (66).