APL. “MYu” mavsumni 5-o‘rinda yakunladi va 2016/17-yilgi mavsumda YeChL turnirida ishtirok etmaydi

Angliya chempionatining so‘nggi 38-turidan o‘rin olgan “Manchester Yunayted” – “Bornmut” uchrashuvi 15-may, yakshanba kuni bo‘lib o‘tishi kerak edi. Ammo “Old Trafford” stadionining Shimoli-G‘arbiy qismidagi sektorlaridan birida topilgan shubhali paket tufayli o‘yin qoldirilgan edi.

• “Lester” klubi o‘z tarixida birinchi bor Angliya chempionligini qo‘lga kiritdi

Keyinroq paketning ichidagi buyum portlovchi qurilmaga o‘xshash mulyaj — o‘quv-tayyorgarlik moslamasi bo‘lib chiqdi va uchrashuv 17-may kuni bo‘lib o‘tishi xabar qilindi.

• APL. “Arsenal” mavsumni kumush medallar bilan yakunladi 

“Sports.ru”ning xabar berishicha, 18-mayga o‘tar kechasi bo‘lib o‘tgan uchrashuvda “Manchester Yunayted” 3:1 hisobida “Bornmut”ni mag‘lubiyatga uchratib, 66 ochko to‘plagan holda hamshahari “Manchester Siti”ga yetib oldi. Ammo, “shaharliklar”ning to‘plar nisbati +30, “MYu”niki +14 bo‘lgani uchun 2016/17-yilgi mavsumda Yevropa Chempionlar Ligasi saralash bahsida ishtirok etish imkoniyatini beruvchi to‘rtinchi o‘rin “Manchester Siti”ga nasib qildi.

Lui van Gal shogirdlari esa beshinchi o‘rinda qolib ketdi. Angliya Premyer-ligasida beshinchi o‘rin Yevropa Ligasi turnirida ishtirok etish huquqini beradi.

“Manchester Yunayted” — “Bornmut” uchrashuvi bilan Angliya Premyer-ligasining 2015/16-yilgi mavsumiga rasman yakun yasaldi.

Qayd etish joiz, “qizil iblislar” joriy mavsumni sovrin bilan yakunlash imkoniyatiga ega. Lui van Gal shogirdlari Angliya Kubogi g‘olibligi uchun 21-may, shanba kuni Londonning “Kristal Pelas” jamoasiga qarshi bahs olib boradi.

Angliya chempionati, 38-tur

“Manchester Yunayted” – “Bornmut” 3:1 (1:0)

Gollar: 1:0 – 43 Runi, 2:0 – 74 Reshford, 3:0 – 87 Yang, 3:1 – 90, avtogol Smolling.

Ogohlantirish: Mata (66).