Равшан Эрматовни ён босганликда айблаган «Пахтакор» мураббийи жаримага тортилди

Футбол бўйича Ўзбекистон Олий Лигаси 9-туридан жой олган «Локомотив» ва «Пахтакор» ўйинидан кейинги матбуот анжуманида меҳмонлар мураббийи Григорий Колосовский ҳакамлар бригадасини мезбонларга ён босганликда айблаганди.

• «Пахтакор» мураббийи Равшан Эрматовни «Локомотив»га ён босганликда айблади (видео)

ПФЛ расмий сайти Тошкент дербисидан 4 кун ўтиб, аниқроғи 16 май куни «Пахтакор» мураббийи Григорий Колосовский ҳамда клуб ҳужумчиси Игорь Сергеевнинг тартиб-интизом қўмитаси томонидан жаримага тортилгани ва огоҳлантирилгани ҳақида маълум қилди. Унга кўра, мураббий регламентнинг 5.39 ва 5.57 бандлари бўйича, футболчи эса 5.36 ва устози каби 5.57 бандлари бўйича айбдор деб топилган.

«Championat.asia» сайтида мураббий ва футболчига қўлланилган жазо юзасидан чиқиш қилган журналист Фурқат Нишонов, ҳакамлик борасидаги фикри учун Григорий Колосовскийни жаримага тортиш бир ёқлама эканини қайд этган.

Мақолада регламентнинг 5.39 банди келтириб ўтилган бўлиб, унда «ОАВда ҳакамлар бригадаси томонига танқидий фикрлар билдирилса, агар учрашув қайдномасида ҳакамликка нисбатан эътироз ёзилмаган бўлса», — деб ёзиб қўйилган.

• Тошкент дербисида «Пахтакор» пешқадам «Локомотив»дан мағлуб бўлди

«Колосовский ҳакамлар томон эътироз билдиргани рост. Бу борада у жаримага лойиқ. Аммо шу ерда ўша банднинг иккинчи қисми ҳам бор. Яъни, ‘агар учрашув қайдномасида ҳакамликка нисбатан эътироз ёзилмаган бўлса’. ‘Локомотив’ — ‘Пахтакор’ учрашувининг қайдномасида меҳмонлар беллашув ҳакамлигига нисбатан расман эътироз билдирган. Демак, Колосовский жаримага тортилаётганда банднинг иккинчи қисми ҳам инобатга олинса мақсадга мувофиқ бўларди», — деб ёзган журналист ўз мақоласида.

Регламентнинг 5.57 бандида «ЎзПФЛ ЎФФнинг тартиб-интизом қўмитасисиз ҳам пуллик жарималарни қўллаши мумкин» экани ҳақида ёзилган. Шунингдек, Игорь Сергеев «Учрашув давомида ва беллашувдан кейин одоб-аҳлоқ меъёрларини бузгани учун», — деб ёзиб қўйилган бандга кўра айбдор бўлган.

Мақолада регламентда қўлланилиши мумкин бўлган жазо турлари ҳам келтириб ўтилган:а) огоҳлантириш;б) Ўзбекистон чемпионати, Ўзбекистон Биринчилиги ва Ўзбекистон Кубоги баҳсларидан маълум муддатга четлаштириш;в) 10 миллион сўмгача бўлган жарима;г) лицензия бекор қилиниши;д) футболга боғлиқ барча вазифалардан номаълум муддатга четлаштириш;

ПФЛ расмий сайтига кўра, «Пахтакор» вакиллари огоҳлантирилган ва жаримага тортилган. Жарима миқдори қанча экани эса кўрсатилмаган.