Ravshan Ermatovni yon bosganlikda ayblagan “Paxtakor” murabbiyi jarimaga tortildi

Futbol bo‘yicha O‘zbekiston Oliy Ligasi 9-turidan joy olgan “Lokomotiv” va “Paxtakor” o‘yinidan keyingi matbuot anjumanida mehmonlar murabbiyi Grigoriy Kolosovskiy hakamlar brigadasini mezbonlarga yon bosganlikda ayblagandi.

• “Paxtakor” murabbiyi Ravshan Ermatovni “Lokomotiv”ga yon bosganlikda aybladi (video)

PFL rasmiy sayti Toshkent derbisidan 4 kun o‘tib, aniqrog‘i 16-may kuni “Paxtakor” murabbiyi Grigoriy Kolosovskiy hamda klub hujumchisi Igor Sergeyevning tartib-intizom qo‘mitasi tomonidan jarimaga tortilgani va ogohlantirilgani haqida ma’lum qildi. Unga ko‘ra, murabbiy reglamentning 5.39 va 5.57 bandlari bo‘yicha, futbolchi esa 5.36 va ustozi kabi 5.57 bandlari bo‘yicha aybdor deb topilgan.

“Championat.asia” saytida murabbiy va futbolchiga qo‘llanilgan jazo yuzasidan chiqish qilgan jurnalist Furqat Nishonov, hakamlik borasidagi fikri uchun Grigoriy Kolosovskiyni jarimaga tortish bir yoqlama ekanini qayd etgan.

Maqolada reglamentning 5.39 bandi keltirib o‘tilgan bo‘lib, unda “OAVda hakamlar brigadasi tomoniga tanqidiy fikrlar bildirilsa, agar uchrashuv qaydnomasida hakamlikka nisbatan e’tiroz yozilmagan bo‘lsa”, — deb yozib qo‘yilgan.

• Toshkent derbisida “Paxtakor” peshqadam “Lokomotiv”dan mag‘lub bo‘ldi

“Kolosovskiy hakamlar tomon e’tiroz bildirgani rost. Bu borada u jarimaga loyiq. Ammo shu yerda o‘sha bandning ikkinchi qismi ham bor. Ya’ni, ‘agar uchrashuv qaydnomasida hakamlikka nisbatan e’tiroz yozilmagan bo‘lsa’. ‘Lokomotiv’ — ‘Paxtakor’ uchrashuvining qaydnomasida mehmonlar bellashuv hakamligiga nisbatan rasman e’tiroz bildirgan. Demak, Kolosovskiy jarimaga tortilayotganda bandning ikkinchi qismi ham inobatga olinsa maqsadga muvofiq bo‘lardi”, — deb yozgan jurnalist o‘z maqolasida.

Reglamentning 5.57 bandida “O‘zPFL O‘FFning tartib-intizom qo‘mitasisiz ham pullik jarimalarni qo‘llashi mumkin” ekani haqida yozilgan. Shuningdek, Igor Sergeyev “Uchrashuv davomida va bellashuvdan keyin odob-ahloq me’yorlarini buzgani uchun”, — deb yozib qo‘yilgan bandga ko‘ra aybdor bo‘lgan.

Maqolada reglamentda qo‘llanilishi mumkin bo‘lgan jazo turlari ham keltirib o‘tilgan:a) ogohlantirish;b) O‘zbekiston chempionati, O‘zbekiston Birinchiligi va O‘zbekiston Kubogi bahslaridan ma’lum muddatga chetlashtirish;v) 10 million so‘mgacha bo‘lgan jarima;g) litsenziya bekor qilinishi;d) futbolga bog‘liq barcha vazifalardan noma’lum muddatga chetlashtirish;

PFL rasmiy saytiga ko‘ra, “Paxtakor” vakillari ogohlantirilgan va jarimaga tortilgan. Jarima miqdori qancha ekani esa ko‘rsatilmagan.