Мирзо Улуғбек номидаги Ўзбекистон Миллий университети (ЎзМУ) ректори, филология фанлари доктори, профессор Шуҳрат Сирожиддинов янги ташкил этилган Алишер Навоий номидаги Тошкент давлат ўзбек тили ва адабиёти университетига ректор этиб тайинланди. Бу ҳақда, ЎзМУ вакилларига асосланиб, «Газета.uz» хабар бермоқда.
Янги олий таълим муассасаси Ўзбекистон Президенти Ислом Каримовнинг 13 майдаги фармонига асосан ташкил этилган эди.
Шуҳрат Сирожиддинов (1961 йилда туғилган) 2015 йилнинг июнидан ЎзМУга раҳбарлик қила бошлаган эди. Бунгача 2014—2015 йилларда ЎзМУнинг ўқув ишлари бўйича проректори, 2012—2014 йилларда Самарқанд давлат чет тиллар институти ректори, 2005—2015 йилларда эса Ўзбекистон давлат жаҳон тиллари университетининг биринчи проректори сифатида ишлаган. 1984 йили Тошкент давлат университети (ҳозирги ЎзМУ)нинг Шарқ факультетини тамомлаган.
ЎзМУ сайтида қайд этилишича, Шуҳрат Сирожиддинов матншунослик ва адабиётшунослик соҳаларида катта олим сифатида танилган. У 16 та монография, рисолалар ва ўқув услубий қўлланмалар ҳамда 140 дан ортиқ илмий мақолалар муаллифи.
Тошкент давлат ўзбек тили ва адабиёти университети ЎзМУнинг ўзбек тили филологияси факультети, Низомий номидаги Тошкент давлат педагогика университетининг ўзбек тили ва адабиёти факультети, шунингдек, Фанлар Академиясининг Алишер Навоий номидаги Тил ва адабиёт институти негизида ташкил этилмоқда. Университет дастлабки талабаларни 2016/2017-ўқув йилиданоқ қабул қилади.
Изоҳ (0)