Mirzo Ulug‘bek nomidagi O‘zbekiston Milliy universiteti (O‘zMU) rektori, filologiya fanlari doktori, professor Shuhrat Sirojiddinov yangi tashkil etilgan Alisher Navoiy nomidagi Toshkent davlat o‘zbek tili va adabiyoti universitetiga rektor etib tayinlandi. Bu haqda, O‘zMU vakillariga asoslanib, “Gazeta.uz” xabar bermoqda.
Yangi oliy ta’lim muassasasi O‘zbekiston Prezidenti Islom Karimovning 13-maydagi farmoniga asosan tashkil etilgan edi.
Shuhrat Sirojiddinov (1961-yilda tug‘ilgan) 2015-yilning iyunidan O‘zMUga rahbarlik qila boshlagan edi. Bungacha 2014—2015-yillarda O‘zMUning o‘quv ishlari bo‘yicha prorektori, 2012—2014-yillarda Samarqand davlat chet tillar instituti rektori, 2005—2015-yillarda esa O‘zbekiston davlat jahon tillari universitetining birinchi prorektori sifatida ishlagan. 1984-yili Toshkent davlat universiteti (hozirgi O‘zMU)ning Sharq fakultetini tamomlagan.
O‘zMU saytida qayd etilishicha, Shuhrat Sirojiddinov matnshunoslik va adabiyotshunoslik sohalarida katta olim sifatida tanilgan. U 16 ta monografiya, risolalar va o‘quv uslubiy qo‘llanmalar hamda 140 dan ortiq ilmiy maqolalar muallifi.
Toshkent davlat o‘zbek tili va adabiyoti universiteti O‘zMUning o‘zbek tili filologiyasi fakulteti, Nizomiy nomidagi Toshkent davlat pedagogika universitetining o‘zbek tili va adabiyoti fakulteti, shuningdek, Fanlar Akademiyasining Alisher Navoiy nomidagi Til va adabiyot instituti negizida tashkil etilmoqda. Universitet dastlabki talabalarni 2016/2017-o‘quv yilidanoq qabul qiladi.
Izoh (0)