Геологлар Австралия ғарбида тахминан 3,46 миллиард йил аввал қулаши 11 балли зилзила, бир неча юз метр баландликдаги цунами ҳамда кенг миқёсли вайроналикларга олиб келган, диаметри 30 километр бўлган улкан астероид изларини топди. Бу ҳақда Precambrian Research журналида эълон қилинган мақолада маълум қилинди, деб хабар беради «РИА Новости».
«Мазкур қулаш ҳозирги силкинишлардан анча қудратли бўлган зилзилалар туркуми, қирғоқ қояларини парча-парча қилган шиддатли цунамиларни келтириб чиқарган. Қулашдан сўнг кўкка отилган жисмлар бутун Ер юзи бўйлаб тарқалган бўлиши керак», — деб таъкидлади Канберрадаги Австралия миллий университети тадқиқотчиси Эндрю Гликсон.
Тахминан 3,8—3,5 миллиард йил аввал Ер ва Ой ўша пайтда Қуёш тизими ички қисмида жойлашган йирик астероид ва кометаларнинг мутттасил «бомбардимони»га дуч келарди. Гликсон ва унинг ҳамкасблари Ер тарихидаги энг йирик астероид тушишига даъво қилиши мумкин бўлган шундай қулашлардан бири изларини топган кўринади. Бунинг учун 3,5—3,7 миллиард йил аввал, Ер совуб, унда океанлар ва илк қуруқлик қисмлари пайдо бўлган қадим даврларда пайдо бўлган чўкинди жисмлар қатламларини ўрганишга тўғри келди.
Изоҳ (0)