«Исрофгарчиликни хоҳламадик. Эрим ‘Фалончининг эри’ деган гапни кўтара олмайди. Рамазондан кейин тўй қиламиз». Хонанда Каниза ўз тўйи ҳақида

Хонанда Канизани 28 апрель куни «Истиқлол» санъат саройида ташкил этилган яккахон концерт дастуридан куёв олиб кетди. Концерт олдидан ўтказилган матбуот анжуманида хонанда концерти ва тўйини битта қилмоқчи эканини айтганди.

«Даракчи»нинг Канизадан иқтибос келтиришича, ҳаммаси ҳам хонанда ўйлаганидек бўлмаган: «Мутасадди ташкилот рухсат бермагани учун кўпгина режаларимиз режалигича қолиб кетди. Кўчада куёв мени кутиб тургани катта экранда тўғридан-тўғри кўрсатилиши керак эди, бироқ мутасадди ташкилот бунга ҳам рухсат бермади».

Концерт вақтида келин-куёвларнинг севги тарихи (love story) намойиш этилган, бироқ нима учундир унда Канизанинг турмуш ўртоғи юзи кўрсатилмаган. «Буни турмуш ўртоғимнинг ўзи истамади. ‘Фалончининг эри’ деган гапни кўтара олмайди. Ҳатто мени концерт залидан олиб кетишга ҳам базўр кўндирганман. Саҳнага чиқишга ҳам бир амаллаб рози қилгандим, у режа амалга ошмади», — деди Каниза.

«Концерт ва тўйни битта қилиб ўтказганимизнинг боиси — 300 кишига дастурхон ёзиб, исрофгарчиликка йўл қўйгимиз келмади. 10 йиллик ижод намунамни тақдим қилиш баробарида 4000 томошабин орасидан ёруғ юз билан, оқ либосда янги ҳаётга йўл олганим тўйхонадаги базмдан ҳам ортиқроқ», — деди хонанда.

Наҳотки қариндошлар учун ҳам дастурхон ёзилмаган бўлса?! «Дастурхон ёздик, албатта. Рамазондан кейин оқ либос кийиб, тор доирада тўй ўтказиш режамиз ҳам бор. Балки Ҳайит билан битта қилиб нишонлармиз. Ойижоним нима десалар, шу бўлади. Ҳар қалай 500 кишига дастурхон ёзмаймиз-ку», — дея қўшимча қилди хонанда Каниза.

• Актриса Шаҳзода Муҳамедова ўз тўйини Алишер Навоий номидаги киносаройда ўтказиш истагини билдирди