Актёр Йигитали Мамажонов хонанда Райҳон билан биргаликдаги турмушида туғилган эгизак фарзандлари — Ислом ва Имрон билан тез-тез учрашишга ҳаракат қилишини маълум қилди. Бу ҳақда у «Даракчи» газетасига берган интервьюсида айтиб ўтди.
«Бир ҳафтада бир марта фарзандларим билан кўришиб, бирга вақт ўтказамиз. Ўғилларим билан кўпроқ ўғил болаларга хос ўйинлар ўйнаймиз. Курашиш, турли акробатик ўйинлар, ҳаракатлар бажаришга ҳаракат қиламан», — деди Йигитали.
«Қувонарлиси, улар мен кўрсатаётган ҳаракатларни бажаришга уринишдан ташқари, эҳтиёткор бўлишни ҳам ўрганишяпти. Оилада эркакнинг роли бошқа, айниқса бола тарбиясида отанинг роли бўлиши керак. Шунинг учун ҳам улар билан тез-тез учрашишга ҳаракат қиламан», — деди актёр.
«Ўғилларим учун ошпазликдаги барча маҳоратимни намойиш этишга ҳали улгурганим йўқ. Аммо улар ҳали гўдаклигида болалар бўтқасини пишириб бериш, сутини иситиб ичириш каби юмушлардан қочмасдим. Улғаяверишсин, ҳали улар билан бирга кўп таомлар тайёрлаймиз», — дея қўшимча қилди қилди Йигитали Мамажонов.
Аввалроқ Йигитали Мамажонов «Сабо» газетасига берган интервьюсида Райҳон энди ўтмишда қолганини маълум қилган эди.
Маълумот учун, хонанда Райҳон Ғаниева ва актёр Йигитали Мамажонов 2012 йилнинг ноябрида турмуш қурган эди. 2014 йилнинг май ойида эса Райҳон эгизак фарзанд туққан, уларга Ислом ва Имрон деб исм қўйилгани ҳақида хабар берилганди. 2015 йил январида эса Райҳон ажрашишга ариза берганини маълум қилган эди.
Изоҳ (0)