Google бош компанияси — Alphabet Inc. холдинги 12 май, пайшанба куни АҚШ фонд бозорларининг очилиш чоғида капиталлашув бўйича Apple корпорациясини қувиб ўтди. Бу ҳақда «РБК» хабар бермоқда.
Иккала компания котировкалари ҳам савдолар бошланиши давомида пасайиб борган, бироқ iPhone ишлаб чиқарувчисининг бозор қиймати кўпроқ тушган: Тошкент вақти билан 21:00 да Google акциялари нархда 0,6%, Apple қимматли қоғозлари эса 2,5% йўқотган. Google капиталлашуви шу пайтда 495,9 миллиард, Apple’ники эса 492,6 миллиард долларни ташкил этган.
Инвесторлар ҳафсаласи пир бўлишига дунёда энг йирик iPhone йиғувчиси ҳисобланадиган Тайваннинг Foxconn Technology компанияси тушуми ва фойдаси пасайиши сабаб бўлди. Компания соф фойдаси жорий йил биринчи чорагида 9,2 фоизга — 847 миллион долларгача камайди. Бу эса инвесторлар iPhone сотуви жаҳон миқёсида пасайишидан хавотирланишига туртки берди.
Apple’нинг ўзи биринчи чоракда тарихида илк бор смартфонлар сотуви камайганини қайд этди. Компаниянинг бошқа маҳсулотлари — iPad планшетлари ва Маc компьютерлари сотуви ҳам пасайиб бормоқда.
Эслатиб ўтамиз, олдинроқ Forbes томонидан тузилган дунёнинг энг қиммат брендлари рейтингида Apple етакчиликни сақлаб қолгани ҳақида маълум қилинганди.
Изоҳ (0)