Жанубий Кореяда фуқаролар ва АҚШ ҳарбий хизматчилари ёнаётган бинонинг тўртинчи қаватидан сакраган аёл ва унинг уч фарзандини кўрпа билан тутиб қолди, дея хабар бермоқда «РБК» Пхёнтхэк шаҳридаги ёнғин бўлинмаси қутқарувчиларидан бирига таяниб.
Кўрпани ўнга яқин киши тутиб турган. Улар аёлни дастлаб бир ёшдан тўрт ёшгача бўлган фарзандларини ташлаб юбориб, сўнг ўзи сакрашига кўндирган, чунки ўт ўчирувчилар бу вақтда ҳодиса жойига етиб келишга улгурмаган эди. Болалар жабр кўрмади, уларнинг онаси — 30 ёшли нигериялик аёл арзимас шикастланишлар олди.
Бино гавжум бозор ва АҚШ ҳарбий базаси яқинидаги тор кўчада жойлашган, бу ўт ўчирувчилар кириб боришига халал берган. Шунга қарамай, қутқарувчилар охир-оқибат воқеа жойига етиб келди ва ёнаётган бинодан яна бир аёлни чиқариб олди.
Изоҳ (0)