Туркия Килис ўққа тутилишига жавобан ИШИД марраларига зарба беришда давом этади

Турк армияси Килис шаҳри ўққа тутилишига жавобан ИШИД марраларига зарба беришда давом этади. Бу ҳақда мамлакат президенти Ражаб Тоййиб Эрдўғон 4 май, чоршанба куни минтақа раҳбарияти олдидаги чиқиши чоғида маълум қилди, дея хабар беради «ТАСС».

«Суриядан бизнинг Килис шаҳримизга ракеталар тушиши оқибатида кўпчилик, жумладан, Суриядан келган меҳмонлар нобуд бўлди. Ўққа тутишлар давом этмоқда. Армиямиз келгусида ҳам мазкур ҳужумларга жавоб қайтаради. ИШИД Килисга зарба беришни давом эттирса, янада кўпроқ йўқотишларга дуч келади», — деб таъкидлади Эрдўғон.

Жорий йил бошидан бери Килисда Суриянинг ИШИД томонидан назорат қилинаётган чегараолди ҳудудларидан йўлланган 50 дан ортиқ ракета ва миномёт снарядлари портлади. Бунинг оқибатида 20 киши ҳалок бўлди, 60 дан ошиқ киши жароҳатланди. Улар орасида Туркиядан бошпана топган суриялик қочқинлар бор.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.