Хонанда Каниза концертолди матбуот анжуманида бир неча ҳамкасбларини ундан ғоя ўғирлаганликда айблаганди. Райҳон, Муниса Ризаева, Сарвар ва Комил Канизанинг эътирозларига «Ҳордиқ» газетаси орқали муносабат билдирди, дея хабар беради «Даракчи.uz».
Райҳон:
— Канизанинг қўшиқларини эшитмаганман. Кеча телеканалдан ҳам қўнғироқ қилишди ва шу мавзуда кўрсатув тайёрламоқчи эканликларини айтиб, интервью беришимни сўрашди. Ўзимга эп кўрмаганим учун рози бўлмадим. «Табиб» қўшиғимнинг муаллифлари Сарвар ва Комил фақат биргина сўз ўхшаш эканлигини маълум қилишди.
Сарвар ва Комил (Райҳоннинг сўнгги хит тароналари уларга тегишли):
— Райҳоннинг «Табиб» таронаси илк бора янги концертида янграган эди. Биз «табиб», «ҳабиб» деган сўзларни Каниза қўшиқ қилиб айтмасидан олдинроқ ҳам билганмиз ва бемалол бу сўзлардан фойдаланганмиз. Уларни Каниза хусусийлаштириб олмаган. Ўзбек тилининг бисотидан истаган одам истаганича фойдаланиши мумкин. Канизанинг эътирози, очиғи, бизнинг кулгимизни келтирди.
Муниса Ризаева:
— Каниза каби мени ҳам ўз йўналишим ва дидим бор. Бизни солиштиришнинг ўзи, билмадим, қандай бўлади? Умуман олганда, нафақат Каниза, балки ҳеч кимга тақлид қилмайман. Айниқса, кийиниш борасида! Ҳар бир ўзбек аёлининг рўмол ўраш услуби бор. Мен ҳам клипимда рўмолни аёлларимиз ўрайдиган усуллардан фойдаланган ҳолда ўраганман. Бундан чиқди, клипида рўмол ўраб чиққан ҳар бир хонанда Канизага тақлид қилган бўладими? «Ёнар» номли қўшиғимга ишланган клипда ҳақиқий ўзбек келини образини кўрсатиб берганман ва у Каниза яратган образдан фарқ қилади.
Изоҳ (0)