Нидерландия ташқи ишлар вазири Берт Кундерс фуқароларни вақтинчалик Туркияга сафар қилмай туришга чақирди, дея хабар бермоқда «ТАСС». Бундай огоҳлантириш билан у миллий парламентда асли турк бўлган нидерландиялик журналист аёлнинг қўлга олиниши масаласини муҳокама қилиш чоғида чиқиш қилди.
Вазир сўзларига кўра, Нидерландия ҳукумати ўз фуқароларига, шу жумладан, турк миллатига мансуб бўлган фуқароларга улар мамлакатда ўзларининг ижтимоий тармоқлардаги постлари туфайли нохуш вазиятга тушиб қолмаслигига кафолат бера олмайди.
Эслатиб ўтамиз, Metro газетасининг Нидерландияда чиқадиган нашрида шарҳловчи бўлиб ишлайдиган Эбру Умар 23 апрель, шанба куни Измир вилояти, Кушадаси шаҳридаги уйида ҳибсда олинганди. Бунга журналистнинг Туркия президенти Ражаб Тоййиб Эрдўғонга танқидий муносабати сабаб бўлиши мумкинлиги тахмин қилинмоқда. Кейинроқ у озод этилди, бироқ мамлакатни тарк этмаслик ҳақида тилхат қолдирди.
Изоҳ (0)