Жанубий Судан исёнчилари етакчиси Риек Машар мамлакатнинг биринчи вице-президенти сифатида қасамёд қилди, дея хабар бермоқда «ТАСС» Reuters’га таяниб.
Машар Судан раҳбариятини «халқни бирлаштириш ва фуқаролар уруши яраларини даволаш»га чақирди.
Бир ҳафта аввалроқ БМТ Хавфсизлик Кенгаши тинчлик битими қоидаларининг бажарилиши чўзилаётгани туфайли Жанубий Судандаги вазият юзасидан хавотир билдирган эди. Шошилинч учрашув якунлари бўйича Хавфсизлик Кенгаши аъзолари эришилган келишувларнинг амалга оширилиши йўлидаги ҳар қандай тўсиқларга жавоб қайтаришга тайёрлигини билдирди ва низо томонларини тезкорлик билан ўтиш даври ҳукуматини шакллантириш ва 2015 йил августида имзоланган тинчлик битимини тўлиқ бажаришга чақирди.
Жанубий Судандаги қонли низо мамлакат президенти Сальва Киирнинг 2013 йил декабрида Риек Машарни ўз ўринбосари лавозимидан истеъфога чиқариш қарори туфайли келиб чиққан эди. Икки сиёсатчининг қарама-қаршилиги тезда уларнинг тарафдорлари ўртасидаги шафқатсиз тўқнашувларга айланиб кетди. Оқибатда 10 мингга яқин киши ҳалок бўлди, 2,2 миллиондан зиёд киши қочқинга айланди.
2015 йил августида Киир ва Машар тинчлик битимини имзолади, жорий йилнинг январида эса ўтиш даври ҳукуматини тузиш ҳақида келишиб олди, унга кўра, Машар яна вице-президент лавозимини эгаллайди. Аммо томонлар ўртасида сезиларли ишончсизлик сақланиб қолмоқда.
Изоҳ (0)