21 апрель, пайшанба куни Канада пойтахти Оттавада Ўзбекистон ва Канада ташқи ишлар вазирликлари ўртасидаги сиёсий маслаҳатлашувларнинг олтинчи раунди бўлиб ўтди. Бу ҳақда Ўзбекистон Республикаси Ташқи ишлар вазирлиги матбуот хизмати хабар бермоқда.
Канада Ташқи ишлар ва халқаро савдо вазирлиги делегациясига Европа ва Евросиё ишлари бўйича бюро Бош директори Мэтью Левин раҳбарлик қилди.
Учрашувда икки томонлама муносабатларнинг барча жиҳатлари юзасидан батафсил фикр алмашилди. Шунингдек, 2015 йил бошида Тошкент шаҳрида бўлиб ўтган сиёсий маслаҳатлашувларнинг бешинчи раунди чоғида эришилган келишувларни амалга ошириш жараёни атрофлича муҳокама қилинди.
Суҳбат давомида турли соҳалардаги ҳамкорликни босқичма-босқич ривожланишидан Ўзбекистон ва Канада бирдек манфаатдор эканлиги қайд этилди. Икки томонлама алоқаларни чуқурлаштириш, савдо-иқтисодий, инвестицион, сайёҳлик ва бошқа соҳаларда мавжуд бўлган ҳамкорлик салоҳиятини амалда қўллаш истиқболларига алоҳида эътибор қаратилди.
Учрашувда халқаро ва минтақавий долзарб муаммолар, жумладан, Афғонистондаги вазият муҳокама қилинди.
Изоҳ (0)