21-aprel, payshanba kuni Kanada poytaxti Ottavada O‘zbekiston va Kanada tashqi ishlar vazirliklari o‘rtasidagi siyosiy maslahatlashuvlarning oltinchi raundi bo‘lib o‘tdi. Bu haqda O‘zbekiston Respublikasi Tashqi ishlar vazirligi matbuot xizmati xabar bermoqda.
Kanada Tashqi ishlar va xalqaro savdo vazirligi delegatsiyasiga Yevropa va Yevrosiyo ishlari bo‘yicha byuro Bosh direktori Metyu Levin rahbarlik qildi.
Uchrashuvda ikki tomonlama munosabatlarning barcha jihatlari yuzasidan batafsil fikr almashildi. Shuningdek, 2015-yil boshida Toshkent shahrida bo‘lib o‘tgan siyosiy maslahatlashuvlarning beshinchi raundi chog‘ida erishilgan kelishuvlarni amalga oshirish jarayoni atroflicha muhokama qilindi.
Suhbat davomida turli sohalardagi hamkorlikni bosqichma-bosqich rivojlanishidan O‘zbekiston va Kanada birdek manfaatdor ekanligi qayd etildi. Ikki tomonlama aloqalarni chuqurlashtirish, savdo-iqtisodiy, investitsion, sayyohlik va boshqa sohalarda mavjud bo‘lgan hamkorlik salohiyatini amalda qo‘llash istiqbollariga alohida e’tibor qaratildi.
Uchrashuvda xalqaro va mintaqaviy dolzarb muammolar, jumladan, Afg‘onistondagi vaziyat muhokama qilindi.
Izoh (0)