«Яндекс» ўз браузери учун фойдаланувчиларни сайтларни алмаштириб қўйиш билан боғлиқ фирибгарликлардан ҳимоя қиладиган DNSCrypt технологиясига эга янгиланмани чиқарди, дея хабар бермоқда «Газета.ru» компания пресс-релизига таяниб.
Технология браузер ва DNS-сервер ўртасидаги маълумотлар алмашинуви хавфсиз кечишини таъминлайди. DNSCrypt’ни қўллаб-қувватловчи браузер бозорда илк бора пайдо бўлди.
Компаниядагилар айтишича, фойдаланувчи бирорта сайтни очмоқчи бўлганида, браузер унинг домен номини провайдернинг DNS-серверига юборади ва унга жавобан ўзига тушунарли бўлган рақамли IP-манзилни олади. Одатда браузер ва DNS-серверлар маълумотларни шифрланмаган кўринишда алмашади, шу туфайли фирибгарлар уларни тутиб, алмаштириб қўйишга уринади. Шу тариқа, улар одамларга реклама кўрсатиш, вирус тарқатиш ёки шахсий маълумотларини қўлга киритиш учун, уларни ўзларига зарур манбаларга йўналтиради. Кўпинча фирибгарлар фойдаланувчиларнинг уй роутерларини ҳам бузади ва DNS-сервер манзилини ўзгартиради — охир-оқибат одамлар доимий равишда фирибгарлик ресурсларига тушиб қолади.
Янги функциялардан фойдаланиш учун «Яндекс.Браузер»ни янгилаш ва созламалардан «Доим ‘Яндекс’нинг DNSCrypt шифрига эга ҳимояланган DNS-серверидан фойдаланиш» опциясини танлаш керак.
Изоҳ (0)