Telegram мессенжерининг бот-платформаси янгиланди. TJournal’нинг ёзишича, энди ақлли ёрдамчилардан нафақат алоҳида чатларда, балки махсус буйруқлар ёрдамида исталган суҳбатда фойдаланиш мумкин.
Инлайн-ботлар суҳбатдош билан мавжуд чатга сўров натижаларини дарҳол юбориш имконини беради. Янги бот-платформанинг имкониятларини намойиш этиш учун Telegram тўртта бот тайёрлади — YouTube видеохостинги учун, Foursquare геолокация сервиси учун, Telegram’даги стикерлар учун ва мумтоз мусиқа қидируви учун.
Ботлар алоҳида чатга қайта уланишни ва сўров натижасини йўллаш учун бошқа фойдаланувчи билан суҳбатга қайтишни ўзи мустақил эплай олади. Бундан ташқари, бот ўзи юборган хабарни таҳрирлай олади, шунингдек, фойдаланувчидан унинг қаерда тургани ва телефон рақамини сўрашни ҳам билади.
Янгиланган ботлардан фойдаланиш учун Telegram’нинг энг сўнгги версиясини юклаб олиш зарур. Хабар беришларича, энди ботлар Telegram’нинг шахсий компьютерлар учун мўлжалланган версиясида ҳам ишлайди.
Янгиликлар бот-платформа билан чекланиб қолгани йўқ: мессенжерда юборилаётган фотосуратга изоҳ илова қилиш имкони пайдо бўлди, видеоплеер ўрнатилди, gif-файлларни олдиндан кўриш имкони қўшилди, шунингдек, iOS ва Android’га мўлжалланган мобил дастурлар редизайн қилинди.
Изоҳ (0)