Тошкентда Huawei Mate 8 смартфони 3,4 миллион сўмдан сотувга чиқди

Ўзбекистонда Huawei компаниясининг энг бақувват смартфони — Маtе 8 модели сотила бошлади, деб ёзади «Mobinfo.uz». Қурилма корпусининг 95 фоизи металлдан иборат, ички конструкция эса иссиқлик ажралиб чиқишини камайтириш учун мустаҳкам алюминий қотишмасидан ясалган.

Huawei компанияси Huawei Mate 8 смартфонини CES 2016 кўргазмасида тақдим этган эди. У билан бирга, компания MediaPad M2 планшети, янги ранглардаги Huawei Watch «ақлли» соати ва янги дизайндаги Nexus 6P’ни ҳам намойиш қилган эди.

Huawei Mate 8 бизнесменлар учун имидж смартфони сифатида таърифланди. У 6 дюймли экран, HiSilicon Kirin 950 процессори, 4000 мА/с сиғимли аккумулятор, 16 мегапикселли Sony IMX 298 камераси (асосий) ва 8 мегапикселли олд камерага эга бўлди.

Қурилманинг орқа панелига бармоқ изи сканери жойлашган, у Mate 7 смартфонидаги датчикдан икки марта тезроқ ишлайди. Сканер фото, видео ва ҳужжатларни «қулфлаш», камерани ишга тушириш, қўнғироққа жавоб бериш, будильникни ўчириш учун ҳам қўлланилиши мумкин.

Ўзбекистонда смартфоннинг Mocha Brown корпусдаги 3 Гб тезкор ва 32 Гб ички хотирага эга версияси сотилмоқда. Тошкент бозорида модель 3 миллион 390 минг сўмга таклиф қилинмоқда.

Ушбу қурилмани кўрсатилган нархда сотиб олишга «Дарё» нашри кафолат бермайди. Қурилма ва унинг нархи ҳақидаги ахборот фақат танишиш учун тақдим этилган.