18 апрель куни Euro-Expo.ru сайёҳлик агентлиги директори Светлана Строганова тармоқ фойдаланувчиларидан мактабда синфдошлари масхара қилган ўғлини қўллаб-қувватлашни сўради, деб ёзади TJournal. Саноқли соатлар ичида 11 ёшли Степан минглаб лайкларга эга бўлди, шунингдек, бир нечта таниқли кишилар, жумладан «ВKонтакте»нинг бир йўла икки нафар собиқ матбуот котиби билан дўстлашди.
Строганова унинг ўғли компьютер ўйинлари ва динозаврларга қизиққани, шунингдек, «ВKонтакте» саҳифасида лайклар бўлмагани туфайли, синфдошлари унинг устидан кулганини маълум қилди. У тармоқ фойдаланувчиларидан Степанга эътибор қаратиш орқали уни қўллаб-қувватлашни сўради.
Строганованинг пости Facebook’да оммалашиб кетди, шундан сўнг фойдаланувчилар Степанга минглаб лайклар босди. Боланинг «девор»ида уни қўллаб-қувватловчи жумлалар битилган кўплаб постлар пайдо бўлди.
Изоҳ ёзганларнинг кўпчилиги Степаннинг динозавр ва конструкторларга бўлган қизиқишини маъқуллади ва турли қизиқарли линклар билан бўлишди.
«ВKонтакте» собиқ матбуот котиби Георгий Лобушкин нафақат Степанни ўз дўстлари сафига қўшиб, акцияни қўллаб-қувватлади, балки унинг саҳифасига «Стёпа, биз сен билан!» ёзуви туширилган плакат кўтариб тушган суратини жойлади.
Рэпер Баста эса Степанга бағишланган видеомурожаатини эълон қилди.
«Роскомнадзор» собиқ раҳбари Максим Ксензов болага аватаркасини ўзгартиришни маслаҳат бериб, балога қолди: у бошқа изоҳ ёзувчилар томонидан танқид қилиб ташланди.
Изоҳ (0)