Ҳафтасига бир марта Facebook раҳбари Марк Цукерберг компания ходимларининг саволларига жавоб беради. Учрашув олдидан ички сўровнома ўтказилиб, ушбу жараёнда ходимларга муҳокама учун мавзулар кўтариш ва ўзини қизиқтирган саволларни ўйлаб олиш таклиф қилинади. Gizmodo технологик блогининг аниқлашича, 4 март куни ўтказилган сўровномада «Сиз Facebook Трамп президент бўлишига халақит бериши лозим деб ҳисоблайсизми?» деган савол илгари сурилган. Шу муносабат билан нашр муҳаррири Майкл Нуньес ижтимоий тармоқнинг бу борадаги ресурсларини чамалаб кўрди, деб хабар беради Meduza.
Марк Цукерберг бу саволга қандай жавоб бергани номаълум, аммо апрель ойининг бошида ишлаб чиқарувчилар учун ўтказилган конференция чоғида Facebook раҳбари кутилмаганда Дональд Трамп ҳақида фикр билдирди. Сиёсатчининг исми тилга олинмаганига қарамай, Цукерберг уни назарда тутгани ҳеч кимда шубҳа уйғотмади: у Трампнинг иммиграцион сиёсатни қаттиқлаштириш ва интернет эркинлигини чеклаш сингари таклифларига салбий муносабат билдирди.
Марк Нуньеснинг таъкидлашича, бугун Facebook шунчаки бир сайт бўлмай, ҳар куни бир миллиарддан ортиқ фойдаланувчига ахборот етказадиган медиадир.
“Биз бу ерда янгиликларни биламиз, сиёсий қарашларимизни шакллантирамиз, сиёсатчилар билан мулоқот қиламиз. Сиёсатчиларнинг ўзи Facebook’ка катта пул сарфлайди”, — деб мулоҳаза юритади у.
Анъанавий ОАВ ўз фаолиятида профессионал стандартларга риоя этади. Жумладан, янгиликни ёритишда холисликни сақлаш асосий талаблардан бири ҳисобланади. Facebook эса бундай мажбуриятларни зиммасига олмаган. Ижтимоий тармоқ соҳиблари хоҳласа, ўзларига ёқмаган номзод ҳақидаги барча маълумотни бир лаҳзада йўқ қилиши мумкин. Мемлар ва вирусли контентга таянадиган кампания учун бу жиддий зарба бўлади. Бундан ташқари, Facebook ўзига маъқул номзодни ҳар тарафлама тарғиб қилиш имкониятига эга. Ижтимоий тармоқни бундай ишдан қайтарадиган ҳеч қандай қонун йўқ.
Майкл Нуньес Facebook аудиториясининг феъл-атворига жиддий таъсир ўтказиши мумкинлигини яққол кўрсатиб берган бир нечта экспериментни ёдга олди. Жумладан, 2012 йилда компания 700 минг фойдаланувчига кўрсатиладиган контентни махфий тарзда алмаштириб борди; бунинг натижасида Facebook фойдаланувчиларга у ёки бу ҳиссиётларни сингдириши мумкинлиги аниқланди.
Gizmodo’да чоп этилган мақола билан танишиб чиққан Facebook раҳбарияти дарҳол баёнот тарқатиб, ўзини одамлар кайфиятини бошқаришга ҳуқуқли деб билмаслигига ишонтирди.
“Сайловларда иштирок этиш — демократиянинг асосий шартларидан бири. Бизнинг вазифамиз — фуқароларнинг ушбу жараёндаги иштирокини қўллаб-қувватлаш, шу боис биз истисносиз барча сиёсий кучларни платформамиздан фойдаланишга чақирамиз. Лекин компания сифатида ҳар доим бетарафлик сақлаймиз: биз ўз маҳсулотимиздан ҳеч қачон одамлар кимга овоз беришига таъсир ўтказиш мақсадида фойдаланмаганмиз, бундан кейин ҳам фойдаланмаймиз”, — дейилади баёнотда.
Изоҳ (0)