Футбол бўйича Осиё Чемпионлар Лигасининг «C» гуруҳида иштирок этаётган Тошкентнинг «Пахтакор» клуби нимчорак финалга чиқиш имкониятларини 5-турдан кейин ҳам сақлаб қолди. Бу йўлда жамоа БААнинг «Ал-Жазира» клубини сафарда 3:1 ҳисоби билан мағлуб этди.
Нўъмон Ҳасановнинг онаси бетоблиги туфайли «Пахтакор» БААга бош мураббийсиз ташриф буюрди. Шунга қарамай Ўзбекистоннинг амалдаги чемпиони муваффақият қозонди. Бунга қадар «Пахтакор» сафардаги ҳар икки ўйинда ҳам енгилганди.
Мазкур ғалабасидан кейин «Пахтакор» очколари сонини 7 тага етказиб олди. Гуруҳда иккинчи бўлиб турган Саудиянинг «Ал-Ҳилол» клубида 8 очко бор. 5-тур тур доирасида «Ал-Ҳилол» ўз майдонида «Тракторсози»дан мағлубият қабул қилиб олди — 0:2.
Чемпионлар Лигасининг сўнгги турини «Ал-Ҳилол» 12 очко билан гуруҳда муддатидан аввал 1-ўринни нақд қилган Эрон клуби майдонида ўтказса, «Пахтакор» Тошкентда «Ал-Жазира»ни қабул қилади. Борди-ю, Саудия жамоаси Эронда зафар қучгудек бўлса, қандай натижа қайд этишидан қатъий назар «Пахтакор» турнирни тарк этади. Тошкент клуби нимчорак финалга йўл олиши учун «Ал-Ҳилол» такрорий беллашувда ҳам очко йўқотиши керак.
Осиё Чемпионлар Лигаси «C» гуруҳи. 5-тур ўйинлари 19 апрель, сешанба
«Ал-Жазира» (БАА) — «Пахтакор» (Ўзбекистон) 1:3
Голлар: Шерзод Каримов, 10 (0:1). Али Мабхут, 61-пен (1:1). Игорь Сергеев, 64 (1:2). Игорь Сергеев, 82 (1:3).«Пахтакор»: Никита Рибкин, Аднан Ораховац, Азим Аҳмедов, Шерзод Каримов (Сухроб Бердиев, 90+2), Жалолиддин Машарипов (Ойбек Қиличев, 88), Игорь Сергеев, Жамшид Болтабоев, Жавоҳир Соҳибов, Камолиддин Тожиев, Даврон Ҳошимов, Владимир Козак (Акбар Исматуллаев, 74).«Ал-Ҳилол» (Саудия Арабистони) — «Тракторсози» (Эрон) 0:2
Голлар: Нонг, 66 (0:1). Хотамий, 81 (0:2).| Ў | Жамоа | Ў | Ғ | Д | М | Т/Н | О |
| 1 | «Тракторсози» | 5 | 4 | 0 | 1 | 9:1 | 12 |
| 2 | «Ал-Ҳилол» | 5 | 2 | 2 | 1 | 8:6 | 8 |
| 3 | «Пахтакор» | 5 | 2 | 1 | 2 | 7:9 | 7 |
| 4 | «Ал-Жазира» | 5 | 0 | 1 | 4 | 2:10 | 1 |
Изоҳ (0)