Навоийда фуқаролар йиғинлари раислари ва уларнинг маслаҳатчилари сайловининг ташкилий-ҳуқуқий асослари мавзусида семинар ўтказилди. Бу ҳақда ЎзА хабар беради.
Ўзбекистон Республикаси Олий Мажлиси Сенати Кенгаши, халқ депутатлари вилоят Кенгаши ҳамкорлигида ташкил этилган тадбирда Сенат аъзолари, ўзини ўзи бошқариш органлари, маҳаллий ҳокимликлар вакиллари, оммавий ахборот воситалари ходимлари иштирок этди.
Бугунги кунда вилоятда 343 та ўзини ўзи бошқариш органи фаолият кўрсатмоқда. Қишлоқ, овул ва маҳалла фуқаролар йиғинларининг жамият ҳаётидаги мавқеини янада мустаҳкамлаш учун замонавий шароитлар яратилмоқда.
Ўзбекистон Республикаси Олий Мажлиси Сенати Кенгашининг 2016 йил 5 мартда қабул қилинган «Фуқаролар йиғинлари раислари (оқсоқоллари) ва уларнинг маслаҳатчилари сайловига тайёргарлик кўриш ҳамда уни ўтказиш тўғрисида»ги қарорига мувофиқ, жорий йил май—июнь ойларида Ўзбекистонда ўзини ўзи бошқариш органларига сайловлар бўлиб ўтади. Навоий вилоятида ҳам ушбу муҳим жараёнга пухта тайёргарлик кўрилмоқда.
– Ўзини ўзи бошқариш органларида сайловларнинг қонунчилик тамойиллари асосида ўтишини таъминлашга алоҳида эътибор қаратилмоқда, – дейди «Маҳалла» хайрия жамоат фонди Навоий вилояти бўлими раиси Н.Исоқов. – Вилоят ва ҳудудий кўмаклашувчи комиссиялар томонидан жойларда ўтказилаётган тадбирларда айни масалаларга алоҳида аҳамият қаратилиб, йиғинлар ҳузуридаги ишчи гуруҳлар аъзоларининг бу борадаги билим ва малакаси оширилмоқда.
Изоҳ (0)