Қарши давлат университети ўқитувчиси Шокир Давлатов мингйилликнинг олтинчи масаласи ечимини топганини маълум қилди. Муаллиф масалани ечиш бўйича ўз нуқтаи назарини «arXiv.org» сайтида эълон қилинган препринтда баён қилган.
«Илмий ишда мингйилликнинг олтинчи масаласи ечими келтирилган: Навье-Стокс масаласининг ягона равон ечими мавжудлиги исботланган», — деб ёзади Давлатов препринтда.
«arXiv.org» сайтида эълон қилинган иш рус тилида ёзилган, аннотациясининг инглиз тилидаги талқини бор. ҚарДУ сайтида Давлатов математика кафедраси профессор-ўқитувчиси сифатида кўрсатилган. «arXiv.org» сайтида унинг бошқа илмий ишлари эълон қилинмаган.
Мингйилликнинг етти масаласидан бири (Анри Пуанкаре назарияси исботи) сўнгги бор 2002 йили россиялик математик Григорий Перельман томонидан ечилган бўлиб, у ҳам ўз илмий ишини «arXiv.org» сайтида эълон қилган эди. Кашфиётни халқаро илмий ҳамжамият тан олган, бироқ олим унга 2010 йили Клэй математика институти (АҚШ, Массачусетс штати, Кембриж шаҳри) томонидан тақдим этилган мукофотдан воз кечган эди.
2014 йили Қозоғистондаги Евросиё миллий университетида фаолият олиб борувчи Мухтарбай Отелбаев мингйилликнинг олтинчи масаласини ечганини маълум қилган эди. Америкалик математик Теренс Тао эса қозоғистонлик олимнинг ечимини рад этувчи аксилмисолларни топган эди.
2015 йил ноябрида Нигериядаги Ойе-Экити шаҳридаги Федерал университетда ишловчи Опиеми Энох Риман гипотезасини исботлашга муваффақ бўлганини маълум қилган эди. Клэй математика институти эса Риман гипотезаси ҳали ҳам исботланмаган, деб ҳисоблайди.
Изоҳ (0)