Navoiyda fuqarolar yig‘inlari raislari va ularning maslahatchilari saylovining tashkiliy-huquqiy asoslari mavzusida seminar o‘tkazildi. Bu haqda O‘zA xabar beradi.

O‘zbekiston Respublikasi Oliy Majlisi Senati Kengashi, xalq deputatlari viloyat Kengashi hamkorligida tashkil etilgan tadbirda Senat a’zolari, o‘zini o‘zi boshqarish organlari, mahalliy hokimliklar vakillari, ommaviy axborot vositalari xodimlari ishtirok etdi.

Bugungi kunda viloyatda 343 ta o‘zini o‘zi boshqarish organi faoliyat ko‘rsatmoqda. Qishloq, ovul va mahalla fuqarolar yig‘inlarining jamiyat hayotidagi mavqeini yanada mustahkamlash uchun zamonaviy sharoitlar yaratilmoqda.

O‘zbekiston Respublikasi Oliy Majlisi Senati Kengashining 2016-yil 5-martda qabul qilingan “Fuqarolar yig‘inlari raislari (oqsoqollari) va ularning maslahatchilari sayloviga tayyorgarlik ko‘rish hamda uni o‘tkazish to‘g‘risida”gi qaroriga muvofiq, joriy yil may—iyun oylarida O‘zbekistonda o‘zini o‘zi boshqarish organlariga saylovlar bo‘lib o‘tadi. Navoiy viloyatida ham ushbu muhim jarayonga puxta tayyorgarlik ko‘rilmoqda.

– O‘zini o‘zi boshqarish organlarida saylovlarning qonunchilik tamoyillari asosida o‘tishini ta’minlashga alohida e’tibor qaratilmoqda, – deydi “Mahalla” xayriya jamoat fondi Navoiy viloyati bo‘limi raisi N.Isoqov. – Viloyat va hududiy ko‘maklashuvchi komissiyalar tomonidan joylarda o‘tkazilayotgan tadbirlarda ayni masalalarga alohida ahamiyat qaratilib, yig‘inlar huzuridagi ishchi guruhlar a’zolarining bu boradagi bilim va malakasi oshirilmoqda.