Туркия ва Исроил муносабатларни тартибга солиш юзасидан келишувларни ишлаб чиқишда силжишга эришди. Бу ҳақда 8 апрель, жума куни Туркия ташқи ишлар вазирлиги томонидан тарқатилган баёнотда маълум қилинган, дея хабар беради «ТАСС».
«Икки мамлакат вакиллари делегацияси 7 апрель, пайшанба куни Лондонда учрашди. Улар тушунмовчиликларни бартараф этиш ва келишув матнини якуний кўринишга келтириш борасида силжишга эришди. Келишув устидаги ишларни яқин орада бўлиб ўтадиган келгуси учрашувда охирига етказиш ҳақида бир тўхтамга келинди», — дея таъкидланган Туркия ТИВ баёнотида.
Айрим манбаларга кўра, келишув 2010 йили Исроил махсус бўлинмаси томонидан Туркияга қарашли «Мави Мармара» паромининг қўлга олиниши чоғида ҳалок бўлганлар учун Исроил томонидан 20 миллион доллар товон тўланишини кўзда тутади. Туркия эса ўз ҳудудида ҲАМАС гуруҳи фаолиятини чеклаш чораларини кўриши айтилмоқда. Шу билан бирга, Анқара Тел-Авивдан муносабатларни тартибга солишнинг мажбурий шарти сифатида Ғазо секторидан қамалнинг олиб ташланишини талаб қилмоқда.
Изоҳ (0)