Буюк Британия бош вазири Дэвид Кэмерон марҳум отаси Иен Кэмерон асос солган Blairmore Investment Trust офшор компанияси акцияларига эгалик қилгани ва улар даромад келтирганини тан олди. Бу ҳақда Meduza хабар бермоқда.

Кэмероннинг айтишича, у ва унинг рафиқаси 1997 йилдан 2010 йил январига қадар (май ойида Кэмерон бош вазир бўлган) Blairmore Investment Trust компаниясининг 5 мингта акциясига эгалик қилган. Улар 12,5 минг фунтга харид қилинган ва 31,5 минг фунтга сотиб юборилган. Олинган йиллик дивидендлар декларация қилинган ва даромад солиғи тўланган.

Бош вазир акцияларга эгалик қилиш унинг учун «табиий» бўлгани, чунки отаси брокерлик билан шуғулланганини маълум қилди. «Уларнинг барчасини 2010 йилда сотиб юборганман, чунки бош вазир лавозимини эгаллаш арафасида эдим ва бирор киши бошқа манфаатларим борлиги ҳақида гапиришини истамасдим», — дея таъкидлаган Кэмерон.