Россиянинг Великий Новгород шаҳрида тўққизинчи синф ўқувчилари муз остига тушиб кетган икки нафар эркакни қутқарди. Бу ҳақда «Интерфакс» хабар бермоқда.
Ҳодиса апрель ойи бошларида рўй берган. 1953 ва 1969 йилларда туғилган эркаклар муз қоплаган карьер орқали кетаётиб, унга тушиб кетган. Тасодифан яқин атрофда бўлган шаҳар гимназияси ўқувчилари тезкор хизмат ходимлари келгунига қадар жабрланганларга ёрдам кўрсатган: калтак ва арқон ёрдамида ўсмирлар ҳамюртларини музли сувдан чиқариб олган. Шу аснода ўзлари ҳам муз остига тушиб кетган, бироқ қирғоққа яқин бўлганлари сабабли мустақил чиқиб олишга муваффақ бўлган.
Қутқаришда бевосита иштирок этган икки ўсмир «Сувда чўкаётганларни қутқаргани учун» медалига тақдим этилади, яна бир ўқувчига ташаккурнома берилади.