Кеча, 6 апрель куни Россиянинг Липецк шаҳридаги фуқаролик ҳолати далолатномаларини ёзиш (ФҲДЁ) ходимлари томонидан Лионель Месси номига туғилганлик ҳақида гувоҳнома берилди. Бундай ноанъанавий исмни ўз ўғлига Испаниянинг «Барселона» футбол клуби мухлиси Николай Волков қўйди, деб хабар беради «Gorod48.ru».
«Фарзандимизга бундай исм қўйиш учун аввал турмуш ўртоғимни кўндириш мушкул бўлди. Кейин эса ФҲДЁ ходимларига бундай исмга туғилганлик ҳақида гувоҳномани ёздириш янада қийин кечди», – дейди бахтиёр ота.
Липецклик Лионель Месси аргентиналик машҳур адаши сингари ойнинг 24-кунида дунёга келди. Бироқ 5 карра «Олтин тўп» соҳиби июнь, липецклик Месси эса март ойида туғилган.
Қайд этиш керакки, туғуруқхонада гўдак онасининг фамилиясига ёздириб қўйилган эди. Гўдакнинг онаси Полина яна бир машҳур, аммо фаолиятини якунлаган футболчи, Руминиянинг ХХ асрдаги энг яхши футболчиси ва «Барселона» жамоаси собиқ ҳужумчиси Георги Хажининг фамилиядошидир.
Волков–Хажилар оиласида Месси иккинчи фарзанд. Уларнинг биринчи фарзандининг исми Грузия маликаси Тамара шарафига қўйилган.
«Ўғлим улғайганида уни ‘Металлург’ футбол клубига олиб бораман. У келажакда футболчи бўлсин!», – дейди Мессининг отаси Николай Волков.
Изоҳ (0)