Россия президенти Владимир Путин Ўзбекистоннинг 865 миллион долларлик қарзидан кечишни назарда тутувчи ўзаро молиявий талаблар ва мажбуриятларни тартибга солиш ҳақида Ўзбекистон билан тузилган битимни ратификация қилиш тўғрисидаги қонунни имзолади. Бу ҳақда Кремль расмий сайтида хабар берилади.
Эслатиб ўтамиз, Россия Федерация Кенгаши 2016 йил 30 мартда «Россия Федерацияси Ҳукумати ва Ўзбекистон Республикаси Ҳукумати ўртасида ўзаро молиявий талаблар ва мажбуриятларни тартибга солиш ҳақидаги Битимни ратификация қилиш тўғрисида»ги қонунни маъқуллаган эди.
Битимга мувофиқ, томонлар собиқ иттифоқ операциялари, жумладан, собиқ иттифоқ Олмос фонди тақсимланиши ва собиқ иттифоқ Ташқи иқтисодий банкидаги ҳисобларда бўлган валюта маблағларини қайтариш масалалари, шунингдек, Ўзбекистонга 1992—1993 йилларда тақдим этилган кредитлар бўйича юзага келган даъволарнинг барчасидан воз кечади.
Ўзбекистон ва Россия молиявий талаб ва мажбуриятларни тартибга солишга оид ҳукуматлараро битимни 2014 йил декабрида Россия президенти Владимир Путиннинг Ўзбекистонга ташрифи доирасида имзолаган эди.
Ҳужжатга кўра, Россия 2014 йил 1 ноябрь ҳолатига Ўзбекистоннинг муддати ўтган 889,3 миллион АҚШ доллари (жумладан, фоизлар бўйича 388,7 миллион доллар) миқдоридаги қарзидан кечади.
Изоҳ (0)