Американинг Apple корпорацияси АҚШ Федерал қидирув бюроси унинг iPhone смартфонларидан бирини қандай бузиб очганини тез орада аниқлайди ва бунга келажакда йўл қўймаслик учун чоралар кўради. Бу ҳақда компания техник мутахассисларига таяниб, Reuters хабар берди, деб ёзади «ТАСС».
Компания таъкидлашича, бюро экспертлари фойдаланган усул маълумотлар тарқаб кетиши натижасида фош бўлиши мумкин. Бундан ташқари, Apple ушбу усул ҳақидаги маълумотлар суд талабига биноан ошкор этилиши мумкинлигига умид қилмоқда. Ҳар иккала ҳолатда ҳам Apple зудлик билан ўз қурилмасини хакерлик ҳужумидан ҳимоя қилиш учун чоралар кўради.
Эслатиб ўтамиз, 16 февраль куни АҚШ суди Apple корпорацияси Федерал қидирув бюроси ходимларига «Сан-Бернардино мергани»нинг телефонини бузиб, ундаги маълумотларни олишда ёрдам бериши лозимлиги ҳақида қарор қабул қилди. Корпорация раҳбари Тим Кук бунга жавобан суд қарорига расмий эътироз билдирилишини таъкидлаган.
Кейинроқ ҳукумат мутахассислари бошқача усул билан, маълумотларни ўчирмасдан туриб қурилмага киришга муваффақ бўлгани, шу туфайли ҳукумат Apple ёрдамига «энди муҳтож эмас»лиги хабар берилган эди.
Изоҳ (0)