Туркиянинг Эскишеҳир шаҳридаги «Эсминятурк» Сазова боғига Бухородаги Болоҳовуз жомеъ масжидининг макети ўрнатилди. Бу ҳақда макетни ўрнатган «Турк дунёси жамғармаси»нинг Facebook’даги саҳифасида хабар берилган.
Аввалроқ «Эсминятурк» Сазова боғига Самарқанддаги Мирзо Улуғбек мадрасаси макети ўрнатилгани ҳақида хабар берилган эди.
Маълумот учун, Бухоро шаҳридаги меъморий ёдгорликлардан бири ҳисобланган Болоҳовуз масжиди қурилиши 1712 йилда бошланиб, орадан икки аср ўтганидан сўнг якунига етган. Хусусан, катта гумбазли масжиди 1712 йили, ҳовли ва ҳужралари XIX асрда, айвони 1915—1917 йилларда, масжид ёнидаги алоҳида турган минора ҳам шу йилларда уста Ширин Муродов ва уста Ҳафизов томонидан қурилган.
«Турк дунёси жамғармаси» (Türk Dünyası Vakfı) жамоат ташкилоти Шарқ мамлакатларининг маданий меросини ўрганиш ва асраш билан шуғулланиб келади. 2015 йилнинг ўрталарида жамғарма тарафидан Эскишеҳир шаҳрида ўзига хос дурдоналар боғи яратилди. Унда Ўзбекистон, Мўғулистон, Қозоғистон, Афғонистон, Ҳиндистон, Болқон давлатларидаги йирик тарихий меъморчилик обидаларининг кичрайтирилган макетлари жойлаштирилди. Булар қаторида Ўрхун битиктошлари, Тож Маҳал ва бошқалар бор.
Изоҳ (0)