25 март, жума куни «Фуқаролар йиғинлари раислари ва уларнинг маслаҳатчилари сайловининг ташкилий-ҳуқуқий асослари» мавзусида видео-мулоқот шаклида семинар ўтказилди. Бу ҳақда тадбирни ташкил қилган Ўзбекистон Республикаси Олий Мажлиси Сенати Кенгашининг Фуқаролар йиғинлари раислари ва уларнинг маслаҳатчилари сайловини ташкил этиш ҳамда ўтказишга кўмаклашувчи комиссиясига таяниб, ЎзА маълум қилди.
Унда Олий Мажлис Сенати Кенгаши Комиссияси аъзолари, онлайн режимида Қорақалпоғистон Республикаси Жўқорғи Кенгеси, вилоятлар ва Тошкент шаҳри ҳокимликлари ташкилий-назорат гуруҳларининг раҳбарлари, фуқаролар йиғинларида сайловни ташкил этиш ва ўтказишга кўмаклашувчи Қорақалпоғистон Республикаси, вилоятлар ҳамда Тошкент шаҳри комиссиялари раислари ва аъзолари, ушбу комиссиялар ҳузурида ташкил этилган ахборот хизматлари раҳбарлари, туман ва шаҳар комиссиялари, «Маҳалла» фондининг ҳудудий бўлимлари раислари, шунингдек, оммавий ахборот воситалари вакиллари иштирок этди.
Семинар чоғида иштирокчилар сайловга тайёргарлик кўришнинг барча босқичлари тўғрисида тўлиқ ахборот ва тушунтириш олди. Олий Мажлис Сенати Кенгаши Комиссияси аъзоларининг чиқишларида сайловнинг ташкилий-ҳуқуқий асосларига алоҳида эътибор қаратилди. Фуқаролар йиғинларида сайловни ташкил этиш ва ўтказишга кўмаклашувчи комиссиялар ва ишчи гуруҳлар олдида турган вазифалар кўриб чиқилди ҳамда амалга оширилиши лозим бўлган чора-тадбирлар белгилаб олинди.
Семинарда фуқаролар йиғинлари раислари ва уларнинг маслаҳатчилари лавозимига муносиб номзодларни кўрсатиш муҳимлиги айтилди. Мамлакат бўйича 9764 нафар фуқаролар йиғинлари раисини, шунингдек, уларнинг 99 мингдан зиёд маслаҳатчиси сайловини муносиб даражада ўтказиш учун зарур шарт-шароитлар яратишда маҳаллий давлат ҳокимияти органлари кўмагининг аҳамияти таъкидланди.
Сенаторлар, Сенат Кенгаши Комиссияси аъзолари семинар иштирокчиларининг кўплаб саволларига жавоб берди. Тадбирлар режасига мувофиқ ҳудудий кўмаклашувчи комиссиялар ҳамда ишчи гуруҳлар аъзолари, оммавий ахборот воситалари ҳамда фуқаролик жамияти институтлари вакиллари иштирокидаги бундай тадбирларни барча туман ва шаҳарларда ўтказиш режалаштирилмоқда.
Изоҳ (0)